កណ្តាល៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាក់នៅថ្ងៃនេះថា មានជម្រើសពីរដែលកម្ពុជាបានស្នើទៅសាធារណរដ្ឋកូរ៉េអំពីការសាងសង់ស្ពានទៅស្វាយជ្រុំហើយថាដោយប្រើប្រាស់មធ្យោបាយកាត់តាមជ្រោយចង្វារ។

សម្តេចតេជោថា ជម្រើសទីមួយគឺត្រូវសាងសង់ពីជ្រោយចង្វារទៅដល់ស្វាយជ្រុំ។ ចំណែកជម្រើសមួយទៀតគឺសាងសង់ស្ពានពីផ្សាររាត្រីភ្នំពេញទៅដល់ជ្រោយចង្វារនឹងធ្វើស្ពានមួយទៀតពីជ្រោយចង្វារឡើងទៅស្វាយជ្រុំតែម្ដង។

សម្ដេចបានបញ្ជាក់ថាការសាងសង់ស្ពាននេះគឺត្រូវធ្វើជាស្ពានខ្សែកាបទាំងអស់ ដោយសម្ដេចសង្ឃឹមថាប្រធានាធិបតីថ្មីនៃសាធារណរដ្ឋកូរ៉េនិងគាំទ្រនូវជម្រើសរបស់កម្ពុជា។

សម្ដេចបានលើកឡើងថា៖ «ចំណុចដែលយើងទទួលបាននេះហើយ ជាផលប្រយោជន៍នៃការដាក់ចំណងទូតរវាងកម្ពុជានិងកូរ៉េ ដែលខ្ញុំពុះពារឲ្យខានតែបាន។ ហើយខ្ញុំមានមោទនភាពណាស់ក្នុងការបង្កើតទំនាក់ទំនងកម្ពុជាកូរ៉េ»។

សម្ដេចតេជោ គឺជាអ្នកដែលជំរុញឲ្យមានការបង្កើតទំនាក់ទំនងកម្ពុជាឡើងវិញនៅក្នុងឆ្នាំ១៩៩៧។

សម្ដេចបានថ្លែងបែបនេះនៅក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ២១ ពីក្រុងតាខ្មៅ ទៅព្រំដែនវៀតណាមនៅព្រឹកថ្ងៃទី២៣ ខែមីនា ឆ្នាំ២០២២នេះ៕

^{PHOTO: EAC NEWS}